張敬軒一連6場《HINSIDEOUT 張敬軒演唱會》噚晚喺紅館完滿結束，雖然今次軒仔出動人情牌，搵咗多年密友關智斌上台做嘉賓而成為焦點，不過依然有唔少負評，好似有人覺得點解會搵胡定欣做表演嘉賓，又或者覺得啲歌唔啱聽。

完騷後，軒仔喺慶功宴接受訪問，講到又再請關智斌上台，佢話：「本來今晚係冇嘉賓，不過見到佢哋坐喺度，嗰晚觀眾幾開心，不過o依家多咗直腸直肚fans，佢哋抱住消費者心態，俾咗錢就可以聽佢哋想聽嘅歌，所以第一晚都有啲老歌迷覺得失望。」

軒仔續謂：「其實都睇唔到咁多，網民嘅意見咪值得參考，我覺得係，因為有好多網民好有智慧，但係6晚夾埋有7萬幾人，如果為咗嗰一百幾十個留言而判斷嘉賓同埋編排，我又覺得唔係好公平。所有嘉賓都係友情牌，佢唔係喺嗰張門票錢包埋，係嗰晚嘅一個驚喜。坦白講，所有嘉賓都係俾面嚟，俾面我又好，成件事又好，呢個人情係冇得計。」

見網上不少留言話唔開心，因為自己睇嗰場嘉賓係胡定欣，其他場次就有關智斌、容祖兒、楊千嬅咁，而且留言真係有晒隊形。可擔心胡定欣睇到會唔開心？軒仔話：「唔會，佢嗰晚啲觀眾嘅反應好好，只不過有歌迷，佢哋唔係唔支持我，只係嗰個消費者心態好重，好似新聞話有啲遊客嚟消費，俾咗錢就係老闆，大家都一樣咁憎，點解又要將呢個心態擺落去我個演唱會度呢？今次我同埋自己嘅團隊，係拎咗200%嘅誠意出嚟，做到值回票價，希望大家將個注意力擺番去騷度，事實上所有嘉賓都係請返嚟o氹大家開心。」

另一方面，有歌迷持贊助商送出之門票入場，但入場後卻被保安稱屬「報失門票」而被拒門外，軒仔話：「唔清楚這件事，完騷會坐低檢討，有時難免會順得哥情失嫂意，好似今次杜絕黃牛用咗好多心機，有啲歌迷透過廣州嘅公司訂飛，個人墊支咗超過100萬元，有邊個歌迷會咁做？」佢仲話：「自己朋友都係咁講，有啲朋友訂咗飛唔俾錢，次次開騷嘅歌酬收唔足，呢啲問題係冇得解決，只係能夠盡量令大家開心。」

精選娛聞，喺晒《娛果》
http://fb.com/appledailyent