中國好香港好，股市好港交所好，港交所好周文耀最好，點解咁講？事關自從Paul周03年5月1日，接替神童鄺其志做咗港交所總裁之後，腳頭鬼咁好，內地大企業一隻隻落嚟掛牌，股市日日交投幾百億，市值破完8萬億又破9萬億，388港交所嘅股價係咁升，由當時8.95蚊（03年5月最低位），到今個月11號嘅58蚊，三個年頭就升咗近50蚊。上個禮拜北京又話准北水南調，每人兩萬美金，有呢條水喉射住，學人話齋，今次想窮都幾難囉。
咁港交所有生意，除咗班股東高興，做總裁嘅亦有名有利；事關周文耀家吓手持328萬股388，當中246萬股係Option，行使價只係8.28元，以上個禮拜四收市價56.25計，每股淨賺47.97元，246萬就即係值成1.18億。

有數得計過你知，就算唔計周總裁嗰900幾萬年薪，入主港交所三年，手上嘅328萬股價值超過1.85億，攤開每年有6150萬，當佢每月返足30日工，每日8小時，時薪超過2萬，睇怕都冇人再敢話「工字不出頭」。
就快60歲嘅Paul周，港大機械工程出身，又喺中大進修過財務。之前喺滙豐投資管理做過亞太區（日本以外）總裁、聯交所行政總裁、香港結算行政總裁同董事。但講到代表作，睇怕都係港交所呢三年！
李華華

讀者如有任何意見或報料，歡迎發送電郵至[email protected]。