立法會噚日表決本年度財政預算案，本來，唐唐可以向住傳媒高舉V字手勢，講句「阿媽，我得咗喇」，然後攞住任內最高票數通過嘅預算案，得得戚戚向阿爺交成績表。點知，可能因為泛聯盟劉秀成嘅一篤屎，令唐唐錯失創造歷史嘅「餐屎」。
舊年份預算案有50票支持，今年派糖冧盡各黨派，政府好老定，數到應該有55張支持票，扣返「請假」唔投票嘅小霍、民建聯馬力同自由黨梁劉柔芬三個人，都最少有52票。點知有人唔生性，「三點不露」嘅寶哥哥噚日「成日不露」，咁都係少一票啫，仲有51票吖。
不過好事總係多磨，投票前一刻，會議廳都未夠51票，唐唐驟眼睇冇乜嘢，不過笑容好似有啲僵硬，好彩，喺截止投票前兩秒，白鴿黨馬丁同何俊仁衝入嚟㩒掣。咦！只係得50票，仲有1票呢？二讀時明明出席咗投埋支持票嘅泛聯盟劉秀成，三讀臨門一腳竟然唔見咗影！投票鐘聲停止，大局已定，今年預算案以50票通過。梁耀忠同陳偉業按慣例投反對票。
投票後全人類追查劉秀成下落，泛聯盟秘書長石禮謙話，劉秀成一直好哋哋，點知晏晝食完啲嘢後開始唔妥，肚痛兼個胃唔舒服，終於頂唔順走咗去解決。有口痕議員話，唔知AO狗仔隊有冇入過廁所搵人呢？呢啲私隱問題，冇人有答案。不過按照正常生理狀況，肚痛去清清腸胃好正常啫。

八方噚晚慰問劉秀成，佢話冇乜大礙，至於係咪去咗廁所冇投票，佢唔願講，只係話「都唔係嗰啲問題。」八方問佢有冇同唐唐道歉，佢話唔使，「差我一票？好似係啩，冇所謂啦。」歷史真係鍾意同人開玩笑，以為可以創造歷史嘅唐唐功虧一簣，噚日吟咗句「東山飄雨西山晴」，表面叫議員好天落雨都支持佢，暗中可能想議員第日屙乜都好，記得忍到投埋票畀佢先。劉秀成今次真係誤打誤撞，名留青「史」。