何澤堯篤定成為今季告東尼獎得主，的確實至名歸，莫講話馬迷公認，就連不少喜歡支持外籍騎師的馬房，亦紛紛提供實力座騎，明晚（26日）除得到方嘉柏及賀賢大力支持外，告東尼亦有交收，「牛精大哥」有上仗入位的杜美爾唔用，而偏偏搵何澤堯操刀，加上三檔好位，有望突圍。

第四場四班1200米：論狀態「天地人」及「牛精大哥」都係托弗馬，但前駒要孭133磅，相對「牛精大哥」只負124磅，有9磅距離，此消彼長之下，加上「牛精大哥」有三檔之助，跑法主動搶放，絕對有權將排八檔，而且好大機會沿途走蝕位的「天地人」殺退。

「牛精大哥」已經連續五仗非勝即位，全在谷草1200米取得，上仗與「飛雲騅」及「星叻」鬥燒，頭兩段造45秒93超快步速，後兩駒先後力竭墮退，唯獨「牛精大哥」可捱到最後數十米才被「開心有你」追過，賽績非常硬淨。

相對「天地人」連贏兩仗，兩次都是慢步速守三四位，直路移出望空贏半馬位，是否真正大超班？仍需在賽事中引證，若用一匹存在疑點兩倍大熱門做膽，我反而博較有分頭的「牛精大哥」做首選。

-----------------------------
7月4日起 《蘋果動新聞》只限升級壹會員閱覽
繼續撐蘋果！