立法會今屆閉幕，九月大考在即，大家搞謝師宴，阿董好似一個慈祥嘅班主任，親自到場勉勵立法會議員小朋友，九月選舉多多努力，又話自己好念舊，希望到咗十月，會再見番在座嘅絕大多數。現場氣氛，一片和諧溫馨。
冇錯。立法會九月又要考試嘞。可惜，呢場考試，係一場唔公正嘅會考。有啲人要落區直選，考足中英數理化史地聖經等共十科，但有啲人毋須直選，由小圈子篤手指搞掂，即是唔使考咁多科，淨係考美工勞作兩科，求其交一幅烏厘馬叉嘅塗鴉，就可以保證及格。
不過，亦有啲人，本來只須考美工勞作就可以過骨，可惜得罪咗校監校長，要佢哋親自落區直選，考足十項全科。田少同周梁，傳說就係兩位受害人。佢哋本來一向循功能組別出選，點知因為田少23條七七事變，同最高學校當局作對，校方大為震怒，23條擱置，中方永難原諒，於是田少為咗要將功贖罪，就要讓番個功能位出嚟，畀愛國愛左人士參「選」，而自己就累埋莎姐，要齊齊焗住直選。