喺台北開幕嘅世大運，雲集世界各地好多靚仔靚女，但台灣人就梗係撐自己友喇！男排項目一對孖仔小鮮肉劉鴻敏同劉鴻杰，可以話最吸睛又話題十足，上個月出咗本半裸寫真，赤住膊仲好大膽咁互摸互挨，「BL」味甚濃。

鴻敏同鴻杰生得好似樣，就咁睇真係傻傻分不清楚，而佢哋之前受訪，都話連裁判有時都分唔到佢兩個邊個打邊個，而最重要就係兩個都有一雙電眼，真係殺死唔少少女，所以喺台灣都有唔少女fans。

既然有名氣，食住個勢上月就出咗本寫真集叫《悸動的青春》，喺台北各大出名書局都有售，亦令本身已經有知名度嘅劉氏兄弟更多人關注，而推出嗰段時間造成搶購熱潮，簽名會仲有高中女學生排隊攞簽名同合照。

不過，劉氏兄弟唔係淨sell樣，出戰世大運前仲參加過一連串比賽，包括亞洲球會排球錦標賽、FIVB世界排球聯賽、亞洲排球錦標賽同埋2018世界男子排球錦標賽亞洲區外圍賽。

世大運男排項目喺周日就開打，中華台北首戰會喺國立台灣大學迎戰法國。