寶baby李國寶呢排忙於為撐老死煲呔連任，又要吹雞籌旗，又要走來走去叫口號，忙到肚屙都冇時間！噚日自己檔祖業東亞銀行派成績表，自然要暫時放低「24小時競選辦主席」呢份神職，歸位做好東亞呢份工！
東亞張成績表跑贏晒分析員嘅預期，仲要碰啱頭號敵人獅子銀行歷史性發盈警，大衞李一定心花放。不過，全日大衞李最有趣嘅回應，反而係雖然重臣陳棋昌退休，但當記者問佢，會唔會叫兩個仔入董事局，大衞李竟然回答「唔使」！

四大可能性

眼見其他有錢佬陸續安排第二代接班，乜解究大衞李唔畀民橋同埋民斌兩兄弟入局呢？可能趕住同煲呔交人，大衞噚日冇解釋就閃咗，所以大家惟有發揮無限想像力。
綜合各方意見，呢一刻諗到嘅可能性包括：一、大衞李交出嚟嘅成績表咁靚，自己領導有方，加上後生精壯有排玩，唔使咁快諗接班人呢個問題；二、兩個公子未夠班；三呢、兩位公子唔得閒；四、就係可能見沙皇細佬章章可能冇得撈，要預留番個位畀佢！上述理由邊個最有可能呢？以大衞李份人心直口快，相信佢自己好快會開估！
講番東亞，噚日宣布做咗41年嘅老臣子、睇中國業務的執行董事陳祺昌5月榮休，大衞話，會叫佢留任做特別顧問，響各方面協助東亞發展。不過，陳董自己完全冇聽過老細呢個諗法！咁即係點？有東亞高層即時插口解圍話，呢個人事安排仲未落實……咁唔知大衞李響公眾面前開咗金口，係咪算落實咗呢？
[email protected]