【新增內容及相片】
為期10日嘅「第23屆釜山國際電影節」前日正式開幕，雖然開幕時遇到颱風「康妮」逐漸逼近釜山，但就無影響開幕活動同埋噚日各電影宣傳活動。

不過因為「康妮」今日登陸釜山，令到今日電影節嘅活動受到影響，根據韓媒報道，「康妮」預計韓國時間中午12時左右離開釜山，街頭出現樹木倒塌、牌子掉落等情況，原本大會有意將戶外活動改為室內舉行，但因為道路情況，以及為咗眾人嘅安全，最終決定取消活動，當中包括韓國時間今日下午3時舉行，劉亞仁及全鍾瑞嘅《燃燒》舞台問候宣傳活動，而二人已於晚上現身宣傳活動，與觀眾作交流。

大會表示下午嘅活動將會根據天氣情況再決定，預計會喺下午兩點或三點左右陸續回復正常。

隨後大會表示，會取消所有韓國時間下午3時30分前舉行嘅活動，當中包括劉亞仁及全鍾瑞嘅《燃燒》宣傳活動。不過韓智敏嘅《白小姐》活動，就會如常於下午4時10分舉行，香港導演關錦鵬跟女星鄭秀文、梁詠琪等人嘅《八個女人一台戲》宣傳活動，亦會於下午4時40分舉行。至下午6時40分，朱智勛會孖金允錫及導演現身《暗數殺人》嘅宣傳活動。

精選韓流，喺晒《娛果》
http://fb.com/appledailyent