現年39歲亞視前高層盛品儒同銳思集團主席蔡一鳳己婚，但佢未肯狠收心養性，近日除爆出有小三Tasha，女方更自稱曾為盛品儒墮胎，盛品儒認數月前趁老婆公幹約會Tasha，更自爆為此跪玻璃向老淒認錯，兩公婆今日出發泰國度假補鑊。但小三Tasha今日凌晨再現身facebook怒插盛品儒，要求佢道歉。

小三Tasha今日凌晨喺facebook留言，鬧爆負心漢盛品儒，要求男方道歉：「呢一年我條氣唔順，所以先係咁打畀佢，我真係用心待你。」Tasha不屑盛品儒否認同佢發生過關係：「如果乜都冇發生過，一個女仔會需要做到這個地步嗎？你屋企幾樓、幾室我仲記得。」Tasha數臭盛品儒，但就大讚其妻蔡一鳳肯畀佢打圓場。

就Tasha所言，盛品儒今日短訊回覆：「不作回應，我先安撫我老婆最重要。」佢封嘴避談，主要因為畀家中長輩訓話。盛品儒原定昨日出席電影活動，但臨時甩底。蔡一鳳今日喺fb話：「希望老公痛定思痛，我之前太忙，這位小姐才有機會不停地撩老公，希望她回頭是岸。一年前已經請呢位小姐唔好再不停發信息打電話給我老公，捍衛家庭是女性本能。」

蔡一鳳繼續保持EQ，佢今午短訊回應：「就算『每件事都爛透了我還是很快樂』，因為活着就值得我們感到開心。有些時候經歷低潮只是為了讓我們再次感受自己是多麼幸運。」對於Tasha今日狠插盛品儒，蔡一鳳就話：「其實我希望呢位女仔快點清醒。James（盛品儒）發畀她嗰啲堅決唔往來的訊息我都睇到，但係佢講嘅，我一啲都睇唔到證據。」