蘇慧恩噚晚喺九展舉行慈善音樂會，將收益捐予香港防止虐待長者協會，小肥擔任表演嘉賓。着住黑色馬甲超短裙騷長腿嘅蘇慧恩，唱出王菲《情誡》、Twins《女人味》等歌曲時，大跳性感舞蹈，自摸又趷籮。之後再唱出一連串關於親情嘅歌，送畀父母同婆婆。

完騷後，蘇慧恩接受訪問話：「今次係第二次開演唱會，上一次演唱會，收益係捐畀小朋友，今次想幫長者。」講到大跳性感舞，佢話打晒底好安全：「唔想太sexy，因為個騷係幫長者，露下膊頭就算，原本只着馬甲冇短裙，但男友要我加條裙。佢唔俾我性感，同佢出街最多只可以着健康型背心短褲。」

佢仲話今次開騷，最開心嘅係婆婆嚟捧場，不過婆婆第一次睇騷時仲好健康，今次就要坐輪椅。蘇慧恩講講下，仲喊住話：「驚係婆婆最後一次嚟睇我演唱會，對唔住，我亂講嘢。因為婆婆令我想幫多啲長者，演唱會入面有好多元素都係送畀長者。」蘇慧恩亦慨歎做藝人太忙，實在太少時間可以陪家人，嚟緊嘅聖誕節，亦都要工作，大時大節都留唔到畀家人，所以特別安排將音樂會其中一部份送畀父母同婆婆。

精選娛聞，喺晒《娛果》
http://fb.com/appledailyent