「民主之父」馬丁唔再參選立法會，好多fans唔捨得佢，正如佢所講，革命尚未成功，點解咁快唔玩呢？馬丁話自己年屆七十，係時候讓路畀新人，佢急流勇退，其他人卻未必做得到。現任立法會議員中，年紀最大係72歲嘅新界王發叔，「中指黃」黃宜弘、呂明華都夠70歲，何鍾泰、李國寶就69；馬丁退下來，呢五位長老何去何從呢？
中國人最愛搞老人政治，喺大陸，60、70歲先係政治黃金年齡，不過世界潮流卻興領袖年輕化，40幾50歲做元首好平常，連中聯辦李剛都話60零歲退休最好。

打扮年輕有助連任

大勢所趨，五位長老今年想角逐連任，如果包裝得年輕啲，實有着數。八方絕對唔係年齡歧視，從政應該不問年齡而係睇政績，尸位素餐嘅應該早唞，各位「立法會植物人」，八方請你哋唔好霸住個位。
新界人傳統上好尊重長輩，所以發叔退休壓力相對細啲，大不了以《基本法》做擋箭牌，指長輩話事係原居民合法傳統權益，況且唔少村長都一把年紀，如果發叔退下來，呢班村長有樣學樣，破壞新界傳統故然不可，違反《基本法》仲大件事，發叔點可以輕言退休！

中指黃唔肯講去留

八方噚日搵「中指黃」，問佢對馬丁退下火線有乜意見，佢自己有冇諗吓後路，呢個問題可能好敏感，中指黃講咗句「不予置評」就收線。中指黃代表中華總商會入立法會，多年來政績如何，自己心中有數，公眾有目共睹嘅係佢憑一隻中指出位，中總內部有換馬訴求係公開秘密，中指黃去留未明朗，扮青春都未必有用。
另一老牌商會廠商會都對現任代表呂明華有意見，之前政務司司長唐英年喺官邸請食飯，鬧出疑似幫「家臣」林大輝拉票風波，反映內部政治角力白熱化，呂明華唔sell青春，八方建議佢突出自己係真正做廠嘅工業家呢個優勢，林大輝只係打工啫，唔係同樣貨色。
工程界何鍾泰近年好低調，如果有人誤指佢已經退咗休，八方擔心有人信以為真，不過少做少錯，唔做唔錯，係從政最高境界，可能工程界就係buy呢種議員，應唔應該畀多四年時間佢，選民要諗清楚。寶哥哥唔做行會，但聲言有幾十位銀行界朋友支持佢連任，佢江湖地位十足，其他人退休都未輪到佢要考慮呢個問題。

mailto:[email protected]