世紀21經理林俊傑話,個買家知道凱旋門車位供應少,所以先買車位後買單位,反正放盤單位多的是,但車位盤呢?租同賣夾埋都唔夠6個!個123萬車位喺正停車場𨋢口旁邊,方便泊完車上樓,加上單邊,面積比一般車位大,所以貴少少個買家都唔介意。原業主兩年前連單位一齊買入,冇淨車位價,不過根據同期同類冇車位嘅單位成交價計,車位市值大約100萬,即係升值23%,升幅仲好過層樓。
以凱旋門車位月租4000蚊計,若果將個車位出租,回報有3.9厘。𠵱家凱旋門車位放盤叫價月租4000蚊,放賣就約110萬。
過百萬買個車位,好多人會覺得唔值,不過啲富豪就未必咁諗,根據中原地產同埋土地註冊處資料顯示,舊年就有最少4個車位成交價逾百萬,全部喺九龍區,包括最貴嘅九龍塘畢架山一號車位,成交價150萬;跟住何文田山1號車位賣咗128萬;最後兩個分別係尖沙嘴御景臺同凱旋門,分別賣105萬同110萬。
[email protected]