當年今日
關於我們

股壇瀏覽器:細經紀行好難捱

蘋果日報 2002/01/24 00:00


港股又轉趨牛皮,成交只得51.29億元,恒指收報10762,跌35點。黑客話今次美國Kmart申請破產保護,反映美國平民消費市場亦唔係好掂,分析員𠵱家重研究事件有咩影響,睇吓美國會否步日本後塵走向通縮?
噚日一間證券行突然結業,而且老闆都失咗蹤。雖然港府識做,即刻將「取消最低佣金制」押後一年至落實,不過都解決唔到經紀行嘅生存問題,細經紀行結業似乎係大勢所趨,今次突然有經紀行老闆「走路」,唔知又會唔會觸發股票擠提呢?

國中走勢有異動
國中控股(202)噚日一度重上1元,成交大增至3200萬元,走勢有異動。此股最近宣布與中國市政工程華北設計研究院、上海佛欣愛建河道治理公司及香港愛建合作,成立國中愛華搞環保建工程,投資額為5000萬元人民幣。Cookie話此股宣布上述合作計劃前已經炒過,噚日先升後回軟,最後只升2%,有派貨味道,不過由於重未派晒貨,相信重有機會炒多轉。
耀科(143)急跌逾20%後停牌,市場傳出董事局高層遭國內機關拘捕,有人知道出咗事,即刻沽貨套現。若果傳聞屬實,此股可以休矣。據聞話隻股有唔少小型基金及炒家持貨,沽起嚟相信跌幅會相當驚人。
經過格林柯爾(8056)及歐亞農業(932)事件後,e莉莎話國內銀行開始收緊對民營企業嘅貸款,令到有關企業好手緊。消息傳出後,傳聞有基金沽貨,有貨要小心啲。格林柯爾噚日挫6.6%,收1.41元,而歐亞則跌2%,收1.41元。