喺台灣參加《超級星光大道》而走紅嘅楊宗緯，噚日喺觀塘apm舉行「楊宗緯鴿子簽唱會」，吸引500名歌迷到場支持。宗緯除咗獻唱三首歌外，又同在場歌迷玩遊戲，表現親切，佢仲逐一擁抱女歌迷。同公司嘅方大同、薛凱琪（Fiona）同周柏豪都有到場支持宗緯。
Fiona喺台上話知道宗緯每日都會游水，所以送上泳褲做見面禮，搞到宗緯收禮物時個樣有啲尷尬。下個月4號係宗緯嘅生日，在場歌迷提早送上生日蛋糕同禮物，不過佢講生日願望時就鬧出個小笑話。宗緯用廣東話講生日願望係希望所有人都好開心同好幸福，但係就將幸福兩個字發音講為「成苦」。

唔捨得香港

喺活動尾聲，宗緯同歌迷一齊大合唱，最後佢再次用廣東話同fans講「我愛你」，之後佢接受訪問時話冇諗過有咁多人支持佢，令佢覺得好感動之餘又好唔捨得離開香港，佢希望完成5月17日喺台灣小巨蛋嘅首個演唱會之後，再嚟香港同歌迷見面。