當年今日

701收料站:易通終於叫開車

蘋果日報 2002/02/02 00:00


經紀陳個幫莊客舊年11月底同小初講,話以前叫做美時,𠵱家叫做易通控股(312)嘅新主入局後有得炒。點知一等就等咗兩個幾月,經紀陳噚日話,今次真係要開車,叫小初留意吓。

10仙水平收夠貨
近排易通成交明顯大咗好多,噚日就升咗7.6%,收11.3仙。經紀陳話隻股喺10仙水平徘徊咗咁耐,相信乜都收乾收淨,聽講下個星期易通新老闆有嘢講。
至於銀両方面,聽聞幕後近日同唔少證券行咬耳仔,相信已經埋好班,好似噚日臨收市時,有證券行喺11.1仙水平,掛出12球買盤,陣容非常龐大。
唔講唔知,今時今日重有唔少人以為易通係賣緊辦公室家具,其實新大股東已經將佢喺國內賣手提電話嘅業務注入。路邊社消息重話,原來嘅辦公室家具業務,將來可能會賣番畀原來嘅大股東。