喺互聯網時代，真係乜嘢都有第一次。「香港第一健筆」林行止寫專欄幾十年，日前遭網民喺《信報》網站論壇質疑「抄襲」《紐約時報》，林生睇完網民留言眼火爆，表示反感，噚日公開反駁。有《信報》中人同八方講，都係首次見到林生咁火。

「肥貓」叫《信報》回水

美國前防長麥南馬拉（RobertStrangeMcNamara）本周一去世，林行止撰文評論其生平，有個網民「肥貓」喺《信報》網站留言，指「林先生全無新意，《信報》今次應該回水！」呢位網民似乎辣㷫咗林生，林行止話寫該文章前，睇過逾萬字資料才落筆，文中有啲資料及價值判斷，「均為《時報》的「訃聞」所無。」
林行止話肥貓對佢嘅批評不公道亦對作者無絲毫尊重，反建議肥貓嘗試將《紐約時報》文章繙譯出來，如果可以譯成一篇〈林行止專欄〉，佢會建議《信報》支付「厚酬」。《信報》網站多林生fans，大部份網民都撐林生，有人甚至話今次可以打誹謗官司；亦有人指如果「肥貓」有真材實料，應該埋頭苦譯，話唔定可以收到可觀報酬！