現年36歲嘅唐詩詠，曾經係單身男夢寐以求嘅對象、「女朋友」嘅指標，但神聖還神聖，同佢嘅感情生活係咪幸福，冇直接關係，仲啱啱相反，入行17年，仲未可以封盤。

唐詩詠喺00年入行拍港台節目《青春@Y2K》嗰陣，已經同余文樂傳緋聞，不過中途盧巧音「加入」，唐詩詠先同余文樂分手。03年唐詩詠加入無綫，仲被封為「最靚四葉女」，石修阿仔陳宇琛識貨力追，被影到帶埋唐詩詠陪家人食消夜。

05年，唐詩詠同崔建邦開始咗一段7年感情，男方多次偷食斷正、犯事，唐詩詠選擇原諒，等待男方回頭，最終四合四離先叫正式斬纜。

唐詩詠之後同洪永城拍劇撻着，呢段感情，維繫咗兩年半，今年5月結束，其間有網友為唐詩詠寫咗一篇叫《有一種女朋友叫唐詩詠》嘅文章，證明佢「好女仔嚟」嘅形象幾咁深入民心。

宣佈分開嘅同時，唐詩詠盛傳被周焯華愛將盧啟邦力追，仲喺晚宴上影咗一張頭貼頭合照。難忍壓力嘅唐詩詠，最終激動爆喊，解釋自己唔係貪錢，同盧啟邦亦只係朋友。