太古同新地合作嘅將軍澳維景灣畔第三期，首批單位下個禮拜六開售，近期呢個盤嘅廣告簡直可以用「鋪天蓋地」嚟形容，一份報紙或周刊隨時見到幾個廣告，發展商之一嘅太古重送Good2me卡給三期買家，響逾100間商店消費都會有優惠。另發展商響鰂魚涌太古城示範單位設抽獎比賽，參觀者響兩個示範單位中揀出喜愛嘅一個，就可以參加抽獎，獎品係42吋等離子顯示屏。

華懋今日搞招聘
近期地產界紛紛高調請人，新地早前搞招聘會，話要請785人，結果有千幾人應徵。華懋今日都搞招聘日，會請308人，分別屬於客戶服務部同娛樂部，重列明每個崗位需要嘅員工數目，等有意應徵嘅心裏有數。
土瓜灣傲雲峰發展商之一嘅新世界，響尖沙嘴新世界中心售樓處隔離留咗間舖，畀經紀做入票處，各代理都擺好陣勢，香港置業就擺咗個促銷站，公司助理董事胡柏榮話，概念係來自街邊啲賣手提電話檔。呢個促銷站價值1700元。
蘭西收到料話中原營業董事劉一姐，噚日率九龍豪宅組主管，同舖位部負責人舉行交流會，了解舖位市場趨勢同投資要訣，背後原因係唔少住豪宅嘅廠家都好有興趣買番啲舖位。
蘭西