當年今日

股路縱橫:注資行動快展開和記港陸要睇實

蘋果日報 2002/01/03 00:00


2002年第一個交易日,港股仍未恢復正常,成交只得27億元,又創下近期全日市的新低紀錄,行情則受外圍影響而反覆走軟,恒指一度下跌156點,午後跌幅收窄,收市報11350,跌46點,期指大部分時間都平水。
藍籌榮辱互見,國企紅籌亦見有盤趁低吸納,開始有番勢,而科技股則大放異采。前日先提過科技股今年可再起風雲,話口未完,一復市就即時應驗。雖然𠵱家全球經濟仍然未有起色,但股市投資係買前景,係買一兩年後嘅價錢,特別係科技股,現時作中線持有,唔好話「賺梗」,但機會冇9成都有8成。
近期台灣同南韓嘅半導體股已行先一步,大幅上揚,香港隻品質國際(243)亦成為春江鴨的上車對象,結果搶上3.175元收市,大升13.4%,聽聞此股已有台灣幫上咗手,股價有機會衝向3.5元的阻力,再向高位推進。

成交大增確認突破
tom.com(8001)升勢亦勁,曾升上4.3元後回到4.225元收,但仍大升0.4元,升幅10%,今次以大成交升破4.15元的前高位阻力,短線可向5字頭推進。tom.com逐步轉型後,現時係科網同印刷媒體業務並進,評價逐步提升,市場對超人要搞好tom仔抱有好大期望。
同屬超人旗下的和記港陸(715),近期股價亦有強勢表現,噚日高收0.56元,升6仙,衝破前高位0.55元阻力,且有大成交7700萬股支持,突破之勢確認,以大型頭肩底的量度升幅計,上升目標指向0.76元,預期升幅有35%。
和黃(013)與陸宗霖合組的公司(和黃佔66.6%權益),現時持有和記港陸71.76%,有關收購已完成半年,注資行動料會在短期內展開,和記港陸值得留意。