報紙有消息話唐司長會派糖，其中一項係削減酒稅，削減幾多就未知咯。唐司長係紅酒專家，無人不知，佢遲遲唔撤銷酒稅，好似撤銷遺產稅咁，就係怕俾人批評佢有利益衝突，酒界人士經常講，如果冇咗酒稅，喺機場地皮內設立一個酒倉，香港可以成為亞洲葡萄酒轉運中心，創造唔少就業機會，亦會刺激紅白酒嘅銷量，令旅遊業受惠。
相信唐司長都係唔敢撤銷酒稅嘅，頂多減稅。有參與零售生意嘅投資Ｌ唔同意減稅噃，佢同餐廳羅拗：「你哋點會要求減稅咁笨㗎。婆乸數好易計，假設一支酒來價一百蚊，酒稅一倍係一百蚊，成本係二百蚊，markup一倍，餐廳售酒價係四百蚊，毛利二百，有乜唔好？嗱，減稅五成嘅話，來價一百，酒稅五十，成本百五，仍然markup一倍，售價係三百，毛利得番一百五十，賺少25%，笨唔笨啲呀！我哋逐樽酒賣出去，都覺得減稅對我哋不利啦！」餐廳羅反駁：「你估次次都可以有毛利100%嘅咩，價錢太高會妨礙銷量，酒價平啲，可以賣多啲，譬如以你講嘅價錢計，現在有個客人開一樽酒，我嘅毛利係二百元，將來減稅後，有一點五個客人開一樽酒，我可以有毛利二百二十五元，每晚賺多啲，一年三百六十五晚就賺多唔少！」

兩人意見相持不下，左丁山係消費者，自然贊成減酒稅，向唐司長歡呼！不過餐廳羅想唐司長注視一啲官僚嘅僵硬作風，窒礙商業運作，原來佢向意大利訂咗一批餐酒，意大利供應商話明預付貨款可以有九五折優待，餐廳羅就滙咗貨款去意大利，慳番5%貨價，但餐酒到港，報關時要交稅（從價稅），海關質疑餐廳羅報少5%貨價，要澄清，唔肯畀佢提貨，餐廳羅話有意大利文嘅貨單（invoice）寫到明有5%折扣噃，海關話：「唔該送張英文貨單嚟」，餐廳羅為之氣結，於是信來信往，卒之到咗限期前先至可以提貨。投資Ｌ話：「你笨咯，應該晨早就寫信去意大利領事館投訴海關歧視意大利文，等意大利領事打電話畀好鍾意意大利歌劇嘅許司長吖嗎！」