【中佬收工】袁富華自豪做外賣仔 敖嘉年唔怕老：懶先最可怕
蘋果日報 2020/06/20 13:20
敖嘉年ViuTV袁富華中佬唔易做
（ViuTV截圖）
由古明華、麥長青、張松枝、袁富華（Ben Sir）、徐威信（艾威）與敖嘉年6個中佬拍攝的ViuTV真人騷《中佬唔易做》昨晚播出最後一集「最後考驗大成功」，在茶餐廳工作的Ben Sir被安排去洗碗，他不停埋怨，事後他說：「都叫咗唔好叫我洗碗㗎啦！我屋企都會洗，但係我會喺煮下一餐前先會洗之前嗰餐嘅碗，我唔使煮食嘅時候你叫我洗碗，其實係違背咗我嘅一個生活習慣，你明唔明呀！不過呢個起碼係一個好好嘅經驗，返到屋企都會改吓我嘅生活習慣，食完一餐抖一陣就洗埋啲碗，咁下次煮飯前就可以即刻煮。」Ben Sir還初嚐送外賣，最終也順利完成任務，兩天辛苦的工作，他賺取了1,200元人工。而在油站工作的艾威則學習如何用電腦洗車器，更要親手為客人的車吸塵。
最後6個中佬坐在大排檔分享感受，職業冇分貴賤，只要靠努力，鼓勵香港人逆境自強！Ben Sir直言曾經過着潦倒生活，戶口沒有錢，待了9個月，他說：「我做咗幾個月茶餐廳，用自己勞力搵到自己嘅生活，我覺得好有尊嚴。只要你肯調整自己嘅心態，你一定搵到活在當下嘅原因，陰天雖然喺度，但晴天一定會嚟。」
艾威則有感如一個年輕人重新投入社會：「所有嘢都要積極，唔可以消極，你唔試過點知呢？」張松枝則說：「唔好介意你年紀大咗，唔識嘅就主動啲問吓後生仔，佢哋應該會教到你。」敖嘉年則認為：「失業唔可怕，你個人懶就最可怕，你肯做任何工作都可以做得，唔怕㗎！」而同樣經歷過人生低潮的古明華與麥長青，也鼓勵任何難關也要積極去面對，擁有責任感與使命感，人生也就過得快樂。
一班中佬轉行體驗過後都有所得着。（ViuTV截圖）
袁富華終於成為一名外賣仔，但送外賣卻意外重重。（ViuTV截圖）
外賣仔唔係咁易做。（ViuTV截圖）
老闆欣賞袁富華做嘢落力。（ViuTV截圖）
艾威以為油站好得閒，但原來連食飯都只有半個鐘時間。（ViuTV截圖）