花花碌碌的萬千世界,阿忠從來只可以在電視及報紙上感受得到,現實世界對他而言,就只有冷冰冰的四面牆。「基本上,呢五年嚟我都冇離開過屋企呢幾百呎嘅範圍,唔係我唔想出去,而係我出唔到去。」阿忠一臉無奈地說。
病情惡化被迫辭工
自從十五歲那年,阿忠被醫生斷定患上肌肉萎縮症以後,他的生活便注定和別人不一樣。「人哋睇嚟一個好簡單嘅動作,好似行路、踎低、起身咁,對我嚟講都會覺得好困難,無端端我又會跌倒,周不時跌到褲都爛。」好不容易才捱至中五畢業的阿忠,撐着柺杖打過幾年工,可惜因為身體狀況愈來愈差,請病假的日子遠較上班的日子多,在迫於無奈下,他惟有辭職在家中專心養病。
近年,阿忠的病情更趨嚴重,四肢肌肉已萎縮致失去活動功能,平日大小事務有賴年邁母親照顧。伍母說,「服侍阿忠都幾辛苦㗎,佢好多嘢都要人哋幫手至做到,所以我半步都唔敢行開,買餸都要急急腳。老實講,喺屋企我重可以勉強應付到,但推佢出街我就冇本事囉。」事實上,年近七旬的伍母本身身體亦欠佳,她雙目患有白內障,僅餘下兩、三成視力,且有耳水不平衡,加上年前曾經爆血管,因此不能操勞。