美股周一晚先升後跌，高位出現一粒十字星，搞到港股投資者亦有些少顧慮，不過內地金融股造好，市場憧憬社保基金買貨，令大市氣氛轉佳，H股指數勁升101點，但恒指則仍要跌7點。美國周二晚公布生產物價指數（PPI），如果數據較預期強勁，美股或會借勢調整。
昨日在0.495元買入40萬股麗豐（1125），可惜升至近期高位0.52元已受阻而回，收0.50元，升2%。

麗豐破頂在望

形態上，麗豐繼續以平頂三角旗整固，估計未來幾日將有突破，現時升軌上移至0.48元，可作為計數位，若升破頂部0.52元則上試0.66元。
百威（718）昨日認真威，大升20%，收0.244元。趙飛雲見百威升抵目標價，在0.242元沽一半食糊，其餘一半則繼續持有，睇吓佢會飛到去邊。
從百威昨日盤路來看，基金已經收亁貨，隨時高處未算高，所以唔捨得沽清貨，睇吓有無意外之喜。
玉皇朝（970）前日再試0.71元已無力再上，按部署減持一半，昨日股價再跌穿計數位0.67元，在0.66元沽清計數，平均仍賺超過2成，今次短炒算係達標完成。
早前提過，玉皇朝與中央電視台合作的動畫電視劇集「神將小兵」，計劃於5月1日在內地播放，所以應有第二浪炒，不妨等候低位再上車。
倉內另一隻股票百仕達（1168），昨日走勢平平，但臨尾抽上2.675元收市，升1.9%，就令日線圖走勢靚番啲，且看今日會否破旗而上，為挑戰3元關做好準備。
趙飛雲