王宗堯﹑張建聲﹑林芊妤（Coffee）﹑黃光亮及老闆蕭定一等，今晚喺尖沙嘴出席電影《壹獄壹世界》慶功宴，而電影上映六日，票房近六百萬。現場影大合照，黃光亮瞓喺地下，演員同記者叫佢褪後啲，話唔夠位影相，黃光亮帶笑爆粗：「點X樣後呀？」

Coffee身穿低胸短裙出席，露出一雙長腿，講到電影嚟緊會IIB級上映，Coffee就話未睇，咁會唔會刪咗佢戲份？佢話：「我未睇，但應該會，之前知道有一個非三級版本。」講到佢喺戲中有好激情慾戲，Coffee表示：「情慾戲應該會刪，最後一場冇情慾，點都會見到我。」

咁如果cut晒係咪好可惜，好似冇出現過囉？佢話：「套戲好都無所謂，為大局着想，犧牲小我。」會唔會拍第二集？佢話梗係想，又希望第二集角色唔同，可以挑戰下自己。咁係咪再拍第二集呢？佢話：「你哋應該幫我哋鼓勵老闆。（再拍會再大膽啲？）呢部尺度已差不多，最近有電影搵我，尺度都好大，我都推咗。」

問到係咪大膽到要露點？佢話：「係呀，所以推咗，一嚟自己接受唔到，二嚟係屋企人，可能我係福建人，緊張屋企人諗法，驚佢哋心臟病發，尊重屋企人。」

咁家人睇咗部戲未？佢話：「未，但姑姐問我係咪有戲上，我話唔使睇啦，都見唔到我，得一分鐘出現。（點解咁講？驚鬧？）入面嘅我唔係乜嘢裸露，但驚佢哋睇完會尷尬，我睇完都有尷尬，何況佢哋？費事姑姐通風報訊話畀阿爸聽。姑姐問我得一分鐘拍嚟做乜，點解宣傳？我話因為我乖囉，好彩阿爸唔係好睇香港娛樂。」