七十年代由日本已故男星高倉健主演嘅經典電影《追捕》，由吳宇森執導重拍，斥資6千萬美元（約4億7千萬港元）製作，演員包括剛榮升老竇嘅日本型男福山雅治、內地演員張涵予、戚薇同吳宇森女兒吳飛霞等演出，該片噚日喺北京舉行發佈會，預計明年賀歲檔上畫。

揼本重拍

擅拍槍戰戲嘅吳宇森，噚日率領演員進行開槍儀式，據知佢呢次重拍《追捕》好揼本，籌備咗17個月，預計會用200支道具手槍、6,000發子彈、2,000件服裝，中港台日韓五地合作同埋有4,000人參與製作。福山對新戲好期待：「很榮幸參與這部電影，而且我作為粉絲可與吳導合作很開心。」佢又讚吳宇森拍攝時加入其風格嘅白鴿畫面：「我很感動和興奮，事後我反覆重看。」
張涵予喺《追捕》飾演杜丘，配音員出身嘅佢話當年因為好鍾意《追捕》而入行，好欣賞高倉健：「當年上映時哄動和震撼，當時電視不普及，我不斷看這部片，從頭到尾的對白和音樂全部都背熟，每天就是跟朋友圍在一起扮演《追捕》不同角色。」

懷念亡友

吳宇森自爆當年睇《追捕》迷上高倉健，兩人惺惺相惜，高倉健大前年離世，佢好難過：「遺憾失去偉大演員，希望拍一部電影懷念這位我喜歡的演員，他在《追捕》為追查真相好勇敢。」
撰文：馮仁昭