人氣男子組合MIRROR今日在中環出席慈善障礙挑戰賽，吸引大批fans到場支持。

姜濤對於被影到在銅鑼灣與一名長髮女子表現親密，他解釋：「嗰日喺銅鑼灣遇到佢，之後佢去搭車，我送佢去，可能角度好近，其實係角度問題，好多人誤會咗。」他強調不是拍拖，身邊的《全民造星》監製黃慧君（花姐）即說：「唔係，我發誓，我人頭擔保，佢就想喇，一定要過我對眼先可以做佢女朋友。」

姜濤坦言擔心報道會影響別人，他說﹕「佢係無辜，同佢都算係啱啱識嘅朋友，因為之前做嘢都有見過吓。」有沒有發展機會？他未有正面回答，只說：「要經過花姐。」花姐笑說：「你唔好講到我咁專制，佢有時間都唔肯整隻腳，點會肯拍拖呀！」問到是否不敢拍拖？姜濤說：「今次嘅事，大家傳來傳去，就變到好似真，所以我唔會諗拍拖，照呢個狀況，就算真係有個適合，我都未考慮住，而家拍拖唔只係我一個人嘅事，仲要對好多人負責，所以我唔會咁輕易拍拖。」

問姜濤是否擔心fans不喜歡？他即說：「佢哋話知道呢個報道，無論真定假，佢哋都好開心，唔會話拍拖就唔開心，佢哋都好大方，（想唔想拍拖？）經過今次，我同女仔接觸都要好小心，一旦有啲被人誤會嘅動作，好多人就會誤會，所以我唔諗拍拖；媽咪都有問我真定假，不過佢都認為呢啲好正常嘅事。」

活動上，MIRROR獲安排在台上分組做運動，包括邱傲然（Tiger）、柳應廷（Jer）同盧瀚霆（Anson Lo）玩sit up，姜濤、陳瑞輝（Frankie）同陳卓賢（Ian）則玩平板支撐，最後，他們齊齊擺出瑜伽動作踢毽。隊長楊樂文（Lokman）表示今次第一次參加慈善賽，笑言已分開兩組比賽，輸就要請食飯。他透露閒時都會相約大家做健身，他說：「通常一個人會有惰性，所以會工作前後去做。」誰人做健身最有潛質？身為健身教練的王智德（Alton）說：「Jeremy（李駿傑）好有上升嘅空間，Stanley（邱士縉）就好完善。」

精選娛聞，喺晒《娛果》
http://fb.com/appledailyent