車路士中場尼高路簡迪早前力壓隊友夏薩特同熱刺中場迪利阿里,獲英格蘭足球撰稿人協會(FWA)投票選為今屆英格蘭足球先生,連同上月贏得由英格蘭職業球員工會(PFA)所頒發嘅英格蘭球員先生,成為雙料獎項得主!簡迪周四就出席FWA舉行嘅晚宴兼正式獲頒獎項,呢位26歲中場領獎時繼續一貫謙虛本色,表示:「呢個獎相當特別,因為我從來唔覺得我係最佳球員,但佢係一個偉大嘅榮譽。呢個獎背後唔只得我一個,因為我哋今季共同成就咗好多嘢,而且仲有英足盃要爭。幾年前我仲喺法國低組別聯賽打滾,5年前我甚至唔係職業球員,而家得到呢個榮譽,象徵住我已經成為一個自己從來無法想像嘅球員。」