今晚華鼎獎紅地毯環節，以韓星最受歡迎，金秀賢出場相當墟冚，不過佢冇停步影相直入會場。

林峯出場都頗受歡迎，佢受訪話:「有少少唔舒服，嚨喉少少痛，我都想同佘詩曼合照，一直忙新工作，好少見舊同事，月底去美國錄音，自己年幾冇出新碟，好期待。」新年去邊度玩?佢話:「啱啱去完滑雪。」係咪凍親?佢話:「我氣管唔好，女朋友有煲佛手瓜湯畀我飲。」

佘詩曼就話自己有少少緊張，問佢想唔想同荷李活明星或韓星集郵?佢反而話想同林峯集郵，因為好耐冇見。而著白西裝嘅張衞健就話：「今日做表演嘉賓，快開工快收工，之後即趕返香港排舞，準備錄台灣新年節目，同去北京做春晚。」

「宇宙最強」甄子丹就話：「有提名開心，努力冇白費。」問佢想唔想同雷神或金秀賢合作?佢話:「佢哋個個都係精英，位位都可以合作。咁會唔會影金秀賢比太太睇?佢就話:「我哋冇睇到嗰劇，小朋友劇就有睇。反而太太曾經同雷神食過飯，讚對方好NICE，希望有機會見面打招呼。」

問到雷神ChrisHemsworth最想見邊個，佢就話:「王力宏，我哋喺Blackhat（黑客特攻）合作過，所以今晚想見佢。」嚟到有冇去觀光或購物？雷神話:「冇，昨天才到，要準備新片，在酒店讀劇本。之後都不會，明早離開這裏返澳洲，要照顧有三個小朋友。」而王力宏表示亦想見雷神:「我哋係好好朋友，新戲噚日上映，拍戲變好朋友，自己今日係歌手、演員兩個身份到場，希望其中一個身份被肯定。」咁忙太太會否投訴?佢話:「太太冇，好支持」會唔會請教雷神有三個小朋友嘅生仔經，佢就話:「佢有三個，自己一個要加油。」