擺脫日股下跌影響，港股自由行，恒指有32點進賬，期指升夠104點。成交好奀，得204億元，減少38億元。好淡雙方角力，其中1方用多少少銀両，即可暫時取勝。
太AC輪3517：太A（019）跌0.40元，收79.25元。下月10日派中期成績表，唔會衰得去邊。吼再回軟少少，譬如回到78元，買C輪，揀3517。隻輪9月尾到期，輪價40仙，溢價2.8%，槓桿率19.8倍（有效12倍），引伸波幅21.3%。另1隻可以諗吓嘅係4709，溢價仲低啲，槓桿率則又細啲。兩隻輪交投都係麻麻，冇法子，太古輪通通都係咁樣。
東亞C輪3576：東亞（023）牛住喺32.30元，距離5月高位33.50元唔係好多，遲早破頂。有機會見正股回軟之時，收啲C輪3576。隻輪明年4月夠鐘，輪價56仙，溢價4%，槓桿率5.8倍（有效4.2倍），引伸波幅32.4%。同太古輪一樣，東亞C輪交投亦係麻麻，3576算係最多買賣嗰隻。

聯通C輪9846：聯通（762）最低7.05元，收番7.25元。聯通係跌得落去爬得起身嘅股票。吼住有時忽然唔見幾個價位，低買C輪9846。隻輪12月初到期，輪價1.36元，溢價2.2%，槓桿率5.3倍（有效4.7倍），引伸波幅28.6%。
聯通有隻C輪4829，10月到期，溢價12.8%。買呢隻，輸多過贏。
章盛