今午（10日）係本港馬圈年度盛事，將會喺第四、五、七、八場次，分跑四場一級賽，為香港瓶、香港短途錦標、香港一哩錦標及香港盃。跑大賽自然吸引唔少馬迷一早喺閘口排定隊等入場，入場馬迷可獲贈國際賽Cap帽，所以場內人頭湧湧。

頭場未開跑之前，馬會就在馬匹亮相圈搞咗一個綜合匯演，先嚟一個醒獅表演打響頭炮，然後一眾表演者嚟個中西合壁舞蹈，隨後歌手張敬軒為馬迷獻唱自己多首名曲，率先嚟一個小型演唱會，帶動現場氣氛急速上升。

現場更見唔少軒仔粉絲帶埋寫住佢大名嘅字牌入場，當軒仔出場時候，即時傳出大量尖叫歡呼聲，其實軒仔早前透露已入紙申請紅館檔期，準備2018年以「降兩度」身分舉行演唱會，今次見到佢狀態咁好，相信呢次演唱會搞得成功！