當紅女見習騎師蔣嘉琦近期灸手可熱，自從4月10日贏四W技驚四座後，最近更連贏七日，手風順到不得了。睇番近期唔少蔣嘉琦贏完原庄配搭再上陣嘅馬繼續交出表現，好似「快寶駒」、「執子之手」及「至尊飛星」均非冠即亞，故此「好友心」及「閃電王」繼續由琦妹執韁，值得睇好。

其中出爭頭場五班千四米的「好友心」，上仗配蔣嘉琦一放到底勝出，臨場由18倍跌至8.3倍開跑，反映有部份人對佢信心十足，難得贏完仍留在五班，等番贏馬路程1400米打王牌報名上陣，看部署有心想打鐵趁熱，或可如廐侶「駕喜」般贏完再贏。

至於跑第十場二班1800米的「閃電王」，上仗初配蔣嘉琦上陣，結果在田草1800米排14檔起步仍能快放帶到，可見人馬非常合拍，今次又係吼番贏馬路程打王牌報名，當起四歲馬有力繼續贏。