黃心穎和許志安自4月爆出「安心事件」後轟動全港，事發後心穎在Instagram公開道歉，又暫停一切演藝工作兼遠走美國，身為家姐的黃心美亦受牽連，除ig遭網民洗版式「強烈譴責」外，更有傳因形象插水，導致跟男友馬桂烽分手。

事發至今近5個多月後，心美終於再度會見傳媒，下午她和王貽興在灣仔為香港開電視拍攝節目，做訪問時略帶緊張的她表示心情還好，提到早前跟男友分手的報導，她說：「其實最初報導出街時，經理人已經代我答咗，今日嘅答案都係一樣，感情事唔回應啦，始終係兩個人嘅事，自己知就夠。」

至於妹妹心穎，有報導指她正在美國重返校園進修，心美表示只能夠透露心穎身在外地：「其餘佢喺邊，做緊乜嘢恕我無可奉告，佢係做錯咗，我作為家姐亦係屋企人，無論如何都會喺佢身邊。」早前樂易玲曾稱，心穎在事發後情緒低落，終日以淚洗面，問到現在的身體及精神狀況如何？她說：「心情都係Up and Down，始終發生咁大件事，需要時間空間去處理同面對自己，承擔結果同責任。」

至於心穎可有返港計劃？心美稱：「我唔知，佢都唔知，希望佢Ready後可以自己返嚟面對大家，到時就唔使再問我。」 同時心美又直言事發後的確帶給全家人困擾，她說：「養兒一百歲長憂九十九，我哋四個女父母本來緊張我哋，今次唔開心一定有，但我哋一家人會努力面對，難過都要過。」

反過來說心美亦表示今次事件令家人們更團結：「每一日都係成長學習，同埋亦係一個機會令我看清好多人與事，好多謝身邊錫我哋嘅朋友，屋企人嘅支持同關心。」至於事發後不少網民因無法在心穎的ig上留言，轉移目標攻擊你，心美表示自己沒有放上心：「我冇做錯嘢，如果佢哋發洩完覺得好啲嘅咁咪由佢哋囉，Haters Gonna Hate，我係大家姐，我受晒Is OK。」

最後問到如果日後工作上碰到許志安、鄭秀文或馬國明可會尷尬，心美表示：「我自己冇諗呢樣嘢，亦唔會刻意去避，至於心情係點依家真係答你唔到，到時再問我呀。」

至於節目拍檔王貽興就表示，今次是一個以男性為主題的節目，介紹男士們喜歡收藏的東西和興趣，有透露年尾要為ViuTV製作新劇，他說：「係一個大型歌舞片，男主角MIRROR咁多位成員，嚟緊要做公開演員招募，要搵一大班女仔去襯托佢哋。」

採訪：曹家誠
攝影：陳慧安

-----------------------------
【撐學生】
召集有心人 撐學生全年睇《蘋果》
立即按此