當年今日
關於我們

求驗客手記:
誰是槍王?今次輪到阿蘇

蘋果日報 2013/07/05 00:00


家人披露、摯友爆料、開啟談判、同意轉會、無限接近、48小時內落實……對於各式各樣嘅轉會新聞,相信各位阿仙奴球迷都聽到厭;今次有個幾有新意嘅,叫做莊家封盤。博彩公司威廉希爾暫停利物浦前鋒蘇亞雷斯轉投阿仙奴嘅受注,令人聯想到有內部人士收到風,阿蘇勢將當槍手!
empty
阿蘇入廠暫停受注
蘇亞雷斯嘅轉會都傳咗一排,大多數報道都係話佢會去皇家馬德里或拜仁慕尼黑,但突然形勢一轉,莊家將阿蘇加盟阿仙奴嘅賠率急劇升溫。SkyBET由21倍改至3.25倍;而威廉希爾仲誇張,熱到1.83倍,之後仲暫停受注㖭!威廉希爾發言人話,有一筆來自西班牙嘅巨額資金,投注阿蘇加盟阿仙奴,所以令到賠率大變。
至於阿仙奴恨簽咗成個月嘅希古恩亦有新消息;今次到希古恩爸爸放料,話佢囝囝已經得到皇馬准許,可以同其他球會傾個人條件,「如果冇批准,我哋點敢接觸其他球會!我哋𠵱家攞到批准,希望來季可以見到佢喺英超比賽啦!」希古恩哥哥早幾日都話:「如果泰維斯去祖雲達斯,希古恩就會去阿仙奴?我覺得係。我唔能夠否認佢非常接近兵工廠。」我求大俠上網見到班阿仙奴球迷都幾灰,有啲就自嘲話根據球會作風,呢單交易會吹到去轉會窗完結為止。
吹極都未簽大牌
呢幾年睇阿仙奴買人,我求大俠總結雲格買人嘅3大原則:21歲以下、轉會費2,000萬鎊以下、來自法甲或者係法國球員。因此,雲格快手簽入耶耶辛洛高係非常符合一貫做法,因為後者係20歲嘅法國兵,最緊要係唔使轉會費!至於希古恩、蘇亞雷斯、費蘭度托利斯呢啲潛在目標都唔符合3大原則,雲格當然要講價講到盡,我睇唔到last day佢都唔扑槌!另外阿仙奴周四開操,大牌新兵未見,冗員就一大班,例如查馬克同宮市亮;主力如禾確特同阿迪達都喺度。
《蘋果動新聞》新版App已經推出,居家遊行上街上網都咁方便,快啲更新,全民動起來!
立即下載↓↓
【iPhone版】 http://bit.ly/appledailyiPhoneapp
【Android版】 http://bit.ly/appledailyandroidapp
有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange