騎師潘頓剛周日（16日）停賽前狂掃五Win，在港累積剛好900頭馬，搵夠聖誕旅費，之後他要停賽三日，直到12月29日沙田馬場40周年紀念賽馬日才復出。

在這段沒有潘頓的日子，到底哪個騎師最開心呢？

翻查戰果，今季潘頓曾在10月尾停賽兩日，田泰安皆日行一善共獲兩Win，而最威水的就是潘頓的澳洲同鄉史卓豐，兩次賽事都起孖共獲四Win。

他在10月28日谷戰贏「勤德兼備」和「龍騰摘星」，10月31日全泥夜賽贏「好叻仔」和「烽煙四喜」，周三（19日）適逢潘頓再次停賽，史卓豐又有機會乘虛而入。

史卓豐今期（19日）泥地夜宴共策四駒上陣，第三場四班1650米「好叻仔」和第六場三班1800米「勤德兼備」，皆是早前有份替騎者起孖的馬匹，兩駒今季長期見勇，兼且演出穩定，人馬合拍有望再交出好成績。

第一場五班1650米「料事如神」，過去唯一上名在同程，今次重遊舊路，可望復有好表現。