前日英國驚天大陰謀事件，只影響前晚歐洲股市，美股當佢冇嘢。昨日歐股開市，又已經收復前市1半失地。恒指升27點，期指升夠79點。計埋滙控（005）同恒生（011）下禮拜同再下禮拜除息拖低48點，期指實係高水64點。
中石化C輪4997：窩輪龍虎榜No.1係中石化C輪4720，由1仙地底泥價升到1.5仙，咁就有升幅50%，有12球易手，有16萬銀嘅主人喺度玩買牆紙遊戲。隻輪本月29日最後買賣（剩番12個交易日），行使價5.028元，正股（386）𠵱家4.56元，計落隻輪最後都係香香公主。隻輪今年4月登場，發行價34.5仙，4月曾見69仙，高位成交多，低位成交少，撻到就嚟用作墊煲底，白骨纍纍又一堆。
要買中石化C輪，4997實際得多。隻輪12月初夠鐘，輪價37.5仙，溢價6.5%，槓桿率12.2倍（有效7倍），引伸波幅33.4%。

國泰C輪3533：龍虎榜No.2係國泰C輪3555，收18.9仙，升42%。下月尾夠鐘，行使價14.38元。正股（293）𠵱家14.18元，下月初除息理論價13.98元，未來個幾月正股升唔夠0.59元，揸隻輪就要輸錢。正路揀國泰C輪，要3533。
上石化C輪3537：龍虎榜No.3係上石化C輪3537，收11.2仙，升27%，有近14球易手。下月下旬到期，溢價22%，槓桿率37.4倍（有效8.9倍），引伸波幅60.1%。咁嘅條件買3537，輸錢成數好高。上石化仲有另1隻C輪4468，亦係博唔過。
章盛