候任特首林鄭月娥嘅新班子同埋行會班底公佈晒，冇乜驚喜，佢就話即係冇驚嚇囉，可能大家反響唔係好大，佢就可以趁機喺7.1上任前輕鬆一下。噚晚去咗睇商台首席智囊有份演出嘅話劇。志雲大師即刻把握機會，捉住佢喺後台做個「專訪」，問問下輕鬆嘢突然問組班、副局人選、改革政策局嘅嘢，但林鄭早知志雲大師作風，冇乜透露口風，就連7.1著咩衫林鄭都話要賣關子。

林鄭話，對芭蕾舞之類嘅演出唔太識欣賞，但就好鍾意睇話劇，中學時更做過話劇嘅編劇，將莎士比亞名著《The Winter's Tale》改編成啱中學生演嘅劇目。

志雲之後問佢7.1會著咩衫，林鄭唔想預早講，但就透露會好似之前7.1咁，預備2套衫替換，「因為戶外同室內係好唔同」。志雲好好記性，幫林鄭回帶，話佢5年前7.1都係升旗禮時著深色，宣誓做政務司司長時就著淺色。

講到組班問題，林鄭笑言佢終於可瞓返個好覺，對於點解搵機電工程署署長陳帆做運房局局長，佢就話陳帆係佢做發展局局長時嘅下屬，陳帆係好鍾意接受挑戰嘅人，「咁就畀份最難啃嘅佢……依家睇嚟(運房局)都係」。一講到副局長人選，林鄭即刻耍官腔，猛話唔係佢一人或者司長決定，揀人時局長有好高參與性，會非常尊重局長佢哋意見，「因為係幫佢(局長)嘅」。