14/15球季車路士喺摩連奴帶領下贏咗英超冠軍，但之後一季極速下滑衰到要護級，搞到摩佬喺季中被炒冇得撈，當中原因之一係車路士贏冠軍後增兵失敗。干地喺上季帶領車仔重奪英超，不過據報佢不滿球會唔肯放更大收購球員話事權畀佢，今夏增兵進展又唔理想，開始再考慮自己嘅去向。

上星期爆出干地傳短訊要踢走前鋒迪亞高哥斯達事件，但球會方面一直都冇表態，令目前仍喺意大利放緊假嘅干地唔多高興。加上干地認為車仔既唔放權畀佢買人，球會增兵工作亦做得唔好，佢想要嘅目標艾華路莫拉達同埋阿歷士辛度，似乎要加盟都難成事；仲有佢嘅得力助手助教賀蘭特決定離開車仔，全職幫英格蘭國家隊，種種原因令干地非常冇癮，就算球會開出一份英超最高年薪領隊嘅新約都係咁話，暫時冇打動筆。