亞視復活，曾華倩、樂瞳同朱慧敏主持直播節目《今晚見》，雖然大講女人話題，但噚晚邀請咗譚詠麟（譚校長）做嘉賓，亞視CEO吳雨同三位靚女主持親自到大堂接到訪嘅譚校長。

華倩話一直以「表哥」稱呼譚校長，問佢節目講女人嘢，但夠唔夠膽問譚校長感情事？華倩話唔會：「做朋友點會問呢啲，兩脇插刀，唔會問唔應該問嘅問題，但節目直播，我個腦快過我把口，希望佢都口快快咁講。」華倩笑言唔怕校長爆料，華倩話：「佢知我嘅嘢多，我都知佢嘅嘢多，如佢爆我，我咪爆番佢，我都想問番佢當年拍MV，點解冇咀我呢個表妹，校長以前食唔少。」

譚校長呢次係畀面華倩嚟撐場，譚校長話：「我嚟撐佢，唔知講乜。」華倩即話聽譚校長歌長大，譚校長笑言：「你當我神主牌，心靈雞湯，你講同偉仔講嘢一樣。」華倩一聽「偉仔」即退後，譚校長搞笑話：「唔使驚，我講曾志偉啫，我唔會爆華倩秘密，佢冇乜好講。」譚校長話曾跟MR.入過亞視，佢話今次發現有唔同：「上次冇咁多燈，o依家冇咁多蜘蛛網。」

此外，同場樂瞳興奮可集譚校長郵，佢都話面對前要小心講嘢，以免踩到炸彈，華倩即話：「你唔好亂嚟，如果唔係下集見唔到你㗎啦。」

最港電影大獎投票網址
http://bit.ly/thekongestfilmawards

精選娛聞，喺晒《娛果》
http://fb.com/appledailyent