阿偉的離去,每個家庭成員都感到悲痛欲絕,當中最感心碎的,要算是其年近八旬的母親張婆婆。「我諗都冇諗過個仔會咁做,逢親天時冷我都關心個仔身體有冇事,我不嬲都冇過問佢啲嘢,點解佢要咁做。」阿偉的妹妹阿汶複述其母當日驟聞兒子自殺身亡時的反應。
「點解會丟低仔女」
三十五歲的阿汶表示,其兄阿偉在家排行第四,有兩姊一兄,當中尤以生性孝順的阿偉最得母親痛錫,只要經濟能力許可,每逢過時過節,其兄都會送些禮物給母親表達心意,因此家人怎麼也想不到這樣一個孝子,竟會忍心讓母親承受白頭人送黑頭人之痛。
三十九歲的阿偉原職中港貨櫃車司機,育有三女一子,年齡分別由五至十歲。約三年前,他與現年三十二歲的前妻感情生變,雙方協議離婚,之後其妻搬往他們所住村屋旁邊的一間小平房,方便照顧子女。
「佢好錫幾個仔女,仔女又好鍾意黐住佢,以前佢每晚放工返嚟,幾個仔女都會撲晒上去佢個身度同佢玩,我真係唔明佢點解會捨得丟低仔女唔理。」阿汶感觸地說。