【新增內容及圖片】
韓國KBS電視台雖然之前發生罷工事件，但無損《KBS演技大賞》今晚如期舉行，頭先一眾入圍各獎項嘅藝人先後現身紅地毯。

頒獎禮約於今日香港時間晚上8時15分舉行，先頒發新人獎、男女配角獎等獎項，至於頒發女子新人獎，由T-ara前成員花英憑《爸爸好奇怪》及金世正憑《學校2017》一齊奪獎，花英因為之前形象太差而屢受到觀眾批評，今次獲獎證明佢演技受到肯定，所以佢一上到台已忍唔住勁喊，更喊住多謝劇組及台前幕後，搞到整個《爸爸好奇怪》嘅劇組都忍唔住眼泛淚光，就連台上擔任司儀兼有份主演嘅李宥利都喺台上陪喊。

而現場訪問到《三流之路》嘅朴敘俊同金智媛時，問到佢哋有冇互相動過心時，佢哋都一齊舉起手，不過朴敘俊就冇正面回答幾時係心動時刻，金智媛就話係睇到朴敘俊打跆拳道嘅時候。

頒獎禮到中段時，就由崔江姬及李東健擔任頒獎嘉賓，頒發特別功勞獎予已故「國民媽媽」金姈愛，崔江姬同李東健都先後喺劇中飾演金姈愛嘅子女，而金姈愛嘅兒子就代表媽咪領獎，金姈愛兒子指自己第四次上台代母親領獎，感謝大家一直支持及喜愛母親嘅作品。

更多韓流，喺晒《娛果》
http://fb.com/appledailyent

【minigame】2017瘋暈人物 返工打機唔使擇日
http://bit.ly/2CeWQkP