《魔盜王》系列一連3集，帶挈廸士尼賺到盤滿缽滿，第3集就要等到明年5月先有得睇，華華一直以為成個古仔係虛構出嚟𠱁細路嘅伎倆，但係噚日華華已經先睹為快，睇咗《魔盜王4之加勒比海島下滿地黃金》。
話說噚日實力建業行政總裁洪建生約咗一班傳媒食晏，講講佢哋個基建投資總額達7000萬美金嘅加勒比海英屬處女群島BeefIsland（牛肉島）度假村項目，華華初時以為牛肉島同拍《加勒比海盜：決戰魔盜王》入面，奧蘭多同尊尼特普打交打到儍嗰個小島一樣，不外乎水清沙幼，海天一色，點知今次洪生畀咗個意外驚喜華華。
原來牛肉島前島主海盜BlackBeard，當年明搶暗掠咗唔少金銀珠寶，喺島下收收埋埋成300箱黃金，之前當地政府已經挖咗一半出嚟，𠵱家仲有成160箱喺地底未搵到。160箱黃金喎！連首富李超人聽到都心郁。
洪生都唔執輸，嗱嗱臨買個金屬探測器，搜尋每個角落，但玩咗一排就放棄喇，因為個探測器乜金屬都探測到，包括萬字夾同鐵釘，佢探測到最近嘅金屬反應離地面都有成16呎，如果次次都挖，真係唔得掂。

做魔王要有財力

聽到呢度，相信大家都對個度假村好有興趣，諗住發個黃金美夢。洪生話，度假村第一期會興建50間高球住宅同40間Marina住宅，預期下個月舉行動土儀式，出年4至5月預售，意向價介乎每呎800至1400元，大家唔好開心住，全部都係美金做單位，平均每呎就要1000美金，住宅單位呎數由1000至6000呎不等，08年中可以入伙。屈指一算，要去淘金最少要有100萬美金，睇嚟想做魔盜王，除咗要用武力，仲要有財力。
至於下個計劃，洪生話會睇吓南美洲地區例如巴拿馬、阿根廷同巴西，有冇好地方發展度假村項目，希望未來3至6個月內可以落實，唔知下次會唔會再刺激啲，成個島都係石油寶庫呢？
[email protected]