小妹最近加入咗「龍女」行列，買咗部單反數碼相機扮專家，可能係新手，啲相無端端影多咗啲唔想影嘅嘢。同軟件公司Adobe業務拓展經理駱渭強傾開，佢哋下月推出嘅全新CreativeSuite5（CS5）系列，當中嘅PhotoshopCS5軟件，「執相」能力神奇，操作簡單，最啱龍友龍女。

變走閒人　仲有高清

阿駱話，好多時影相都影到啲閒人，PhotoshopCS5嘅「由有變冇」功能會執走啲閒人，佢即時喺電腦拎張相出嚟，係一個踩單車女仔行過有水池嘅公園。佢利用軟件噴黑個女仔，幾秒後女仔冇咗，成個水池出晒嚟。好鬼神奇。
阿駱笑笑口話，神奇啲仲有呀，軟件可以將一張魚眼鏡影嘅相，變番正常鏡頭影嘅相，「家啲數碼相記錄晒所拍嘅相機牌子、鏡頭、光圈等，軟件detect咗相片嘅資料，會按要求將變形相變番正常。」佢又話，家數碼相機都有逆光拍攝功能，會用唔同光圈連環快拍幾張，再合成一張，令前後景嘅細節都出到，但因為景物如樹枝會輕微郁動，合成照片啲樹枝會出現鬼影。軟件有一個「removeghosts」功能，可以移走鬼影。
潮流興高清，佢話就算影咗啲唔顯眼嘅相，利用軟件嘅HD高清功能，重新自動調校顏色，無論人物或者係風景相，即刻高清晒，「連個樣都靚埋。」咁好用，等小妹都訂番套先。

電郵：mailto:[email protected]