財政預算案喺上周三（7日）出爐，雖然特區政府庫房「水浸」，但好多市民都呻政府「派糖」唔派錢，阮兆祥就整咗首歌《儍波的》為民發聲，唱爆財政司司長陳茂波，歌詞啜核抵死：「報告都睇過了//政府水浸了派多少//退稅加送玩具//去Ocean Park放紙鳶//中產偷偷笑笑//差餉慳四季太碎料//錯數可有預料//何時被稅局召//成日有錢不派//滴水不漏//十分之壽頭//見到將幾百億送走//慘得我食藥也不夠//隨便扣減啲稅//例牌幾嚿//悶到我想嘔//無論是快樂與難受//佢鬼知道百姓嘅感受」

睇完啲歌詞，知唔知改編邊首歌？唔使估，係由胡鴻鈞《到此一遊》。祥仔將首歌放咗上facebook，話對財政預算案冇乜意見，只不過係將啲意見（又話冇意見？）放喺歌詞上面，仲問網友有冇興趣玩接龍？歡迎留言一齊玩，網友讚「歌詞好貼切」、「心聲！」、「唱得好」。

祥仔喺下周四及五喺紅館舉行「福祿壽演唱會」，今日接受傳媒訪問表示：「我哋每次演唱會嘅QUICK CHANGE環節，都會扮人唱歌，將啲最UPDATE嘅話題或者社會現象，用一個搞笑嘅方式呈現畀大家，陪大家笑看風雲。」

祥仔話今次見財政務算案發表咗，佢哋覺得可能大家都會有啲諗法，所以即刻填首歌嚟玩吓：「呢首歌係成個團隊一人一句咁填出嚟嘅，過程入面大家真係好有默契，好似一個接龍遊戲咁，大家都玩得好開心！過程亦都好順利，半個鐘左右就完成咗個創作。」

問到點解會揀《到此一遊》嚟惡搞？祥仔話：「因為我哋覺得首歌嘅『誰願見死不救 滴水不漏 像一顆石頭』呢幾句歌詞，同現實情況好似好相近咁，所以就從呢首歌出發喇。」

精選娛聞，喺晒《娛果》
http://fb.com/appledailyent