中大有調查發現，話喺1,016名受訪嘅巴士司機中，有60.9%人曾經喺揸車時瞌眼瞓，有二成四承認揸緊車嗰陣瞓着等，驟眼睇落都幾得人驚；巴士公司就回應話佢哋好注重巴士司機嘅健康同埋工作時間。網上即時有好多網友作出討論，《UwantsForum》中，網友garfield619話：「其實我覺得最大責任係巴士公司，畀咁少時間佢哋休息！」網友croshere則話：「同意，而且都係為大家安全着想啫，畀個Break啲司機，一啲都唔過份。」
其實巴士司機喺車程跟車程之間嘅休息時間，係咪真係足夠呢？我曾跟司機傾過，佢哋有揸過海線，又有揸區內線。前者話喺紅隧塞車，搞到次次一返到總站就要開車走，尤其係繁忙時間嗰陣最嚴重，連去廁所時間都無；後者話路線車程較短，所以有足夠時間休息。

好難講係咪每個司機嘅休息時間都足夠，但巴士公司可以適當地調節路線嘅行車時間，等司機休息時間長啲，咁做雖然可能會令班次變得較疏，但至少可以保障到乘客嘅安全呢！
記者：鄭達基

討論網址： http://www.uwants.com/viewthread.php?tid=2886945&extra=page%3D1