港股昨日陰濕非常，開市頭30分鐘，冇乜事，最叻之時更加只係唔見1點。好友以為冇事，點知跟住出現小型瀑布，去到尾，恒指322點化咗灰。中移動（941）與滙控（005），總共拖低恒指171點。
恒指跌幅之大，意料之外。咁仲比較容易做嘢，預個市再跌1日半日，博反彈，反手做好友，做短暫嘅好友。咪再搞啲恒指熊證，炒恒指熊證賺咗錢落袋先。
恒指C輪9614：博大市反彈，賭恒指會升，咪搞啲恒指牛證。呢類嘢有6隻，打靶或畀人barg嘅機會好細，但弊在交投好少，有啲甚至交投一片空白。睇錯市要手起刀落投降，搵對手唔容易。
直接買入恒指C輪9614。隻輪明年1月尾到期，輪價20.4仙，溢價4.2%，槓桿率15.2倍（有效9.4倍），引伸波幅19%。

交行C輪4657：交行（3328）收5.07元，跌8仙。C輪4657收34.5仙，散21%，博反彈買些少。隻輪10月初夠鐘，溢價1.5%，槓桿率14.7倍（有效11.5倍），引伸波幅21.8%，數據算靚。
江銅C輪3536：上周五晚紐約期銅上升2.5%，江銅（358）則跌4%，收7.39元，博反彈，買C輪3536。隻輪10月初到期，輪價1.46元，溢價1%，槓桿率5.1倍（有效4.7倍），引伸波幅46.9%。如果睇錯市，要認錯，自己barg。
章盛