亞視新投資者上場，準時出糧問題雖然依舊未解決，但就已經動作多多，包括第一時間調派自己友何子慧同馬熙擔任要職，傳聞執行董事葉家寶慘被架空0添。

其實家寶過去一年真係好慘，次次亞視有乜嘢騎呢新聞拖糧或者亂吹水話賣盤之類，都係要家寶出嚟頂晒，仲要四出撲水出糧；而且，因為亞視拖糧，家寶一人總共收到勞工處102張傳票，嚟緊10月2號就要上庭，分分鐘要坐監。

但呢個時候，竟然傳出新投資者要踼佢出亞視，今日就有報道話新投資者要調家寶另組一間娛樂製作公司，將佢調離執董呢個位，大有過橋抽板之嫌。

另外，報道話亞視雖然今年6月宣佈有新投資者注資，但因為新投資者同股東蔡衍明未能達成共識，所以一直未有股權變動申請，而家寶喺呢個訪問中就講到而家亞視情況同之前王征時期一樣，新投資者認為蔡衍明應該共同注資，但蔡衍明唔肯出錢，今年6月至8月嘅糧都係新老闆負責，而8月遲出糧，係因為內地慶祝抗戰勝利有3日假期，搞到資金嚟遲咗。

本報記者今日打畀家寶，對於新老闆要調佢離開亞視，家寶就透過WhatsApp話:「我只可以講到目前為止我依然係亞洲電視執行董事，至於將來公司安排點係未知，只知未來公司有好多計劃，亦都曾經同我講過想有一個影視娛樂製作公司，希望我主力睇嗰間公司，而家一切都未有定案，因為公司一路進行緊公司架構同人事組織重組，好多都係傳聞嚟啫。」

問到亞視遲出糧係咪好似之前一樣因為新舊股東爭拗？家寶就話:「唔係新舊股東爭拗，係新股東提出過，希望新舊股東按比例注資亞洲電視，最後舊股東決定唔咁做，導致新股東因為假期各方面原因，新股東啲錢未到。」但其實假期完咗好耐，上個月份糧，到0依家仲有兩成員工未收到，加上有傳新投資者司榮彬曾喺內地涉刑拘，亞視今次買賣又疑涉偷步交易，認真立立亂！