樓價愈升愈貴，連東涌洋房水藍天，都賣到成萬蚊一呎，物業包裝成豪宅，走高檔路線。噚日首次邀請傳媒去東涌睇示範屋，準備咗五架Benz，浩浩蕩蕩成隊到場，走嘅時候，就喺門口等候，真係夠晒氣派。
發展商香港興業今次嘅安排，都係為咗想凸顯洋房嘅尊貴，現場準備派發畀記者嘅樓書，每本都有記者嘅名，希望做到好個人化。
另外，發展商又請咗一對外籍模特兒，扮演夫婦，示範豪客生活。
除咗安排與別不同，示範屋嘅設計，都好有特色，樓底有十六呎高。尤其係主人房套廁，頂部裝咗個玻璃天窗，戶主可以一邊沖涼，一邊望住個天。不過，若果沖涼嗰陣，天台有人就大煞風景嘞，因為從其中一個類似通風口嘅地方向下望，可以望通主人房浴室，乜都睇晒。

碧荔挑戰九七價
豪宅市道火熱，連冷門豪宅都吸引買家，好似薄扶林碧荔花園單號洋房，剛由東半山外籍租客以千九萬承接，創八年新高紀錄，呎價近八千三。
第一太平戴維斯陳于白話，呢宗成交同九七年高峯期，大小相若嘅五號洋房造價，只差百五萬。
碧荔花園只得八幢半獨立屋。今次成交嘅，二千三呎，連逾六百七呎花園及平台。
對上一宗成交係四千呎八號屋，以一千五百萬易手，不過遠在○三年中，難作比較；同九七高位比，就更清楚睇到豪宅市道係幾咁熾熱。