當年今日
關於我們

【口風急轉彎】王宗堯提Baby師妹:唔諗拍拖住

蘋果日報 2015/08/08 06:00

港姐內地廣告拍拖男神羅霖高鈞賢老公蕭定一陸詩韻袁彌明林雨陽Sarah王宗堯生招牌陳詩雅轉口風

袁彌明開設嘅美容產品店由樓上舖進駐地舖,位於銅鑼灣首間地舖今日正式開幕,邀請咗男神王宗堯、同屆港姐好友陸詩韻及高鈞賢撐場剪綵,袁彌明老公林雨陽當然有現身支持,袁彌明身穿一套開胸晚裝,仲話要經過老公同意先可以少少性感。

袁彌明以19萬月租開設地舖,最近又搵咗王宗堯一齊拍廣告做生招牌,吸納唔少客戶,對呢幾日新舖生意好滿意,但嘆搵藝人拍廣告好貴,袁彌明話:「王宗堯因為係蕭定一旗下,已經友情價,但紅咗就唔會再平得幾多,另一方面仲想搵較成熟年齡層女代言人,覺得羅霖好適合,希望可以同佢合作。」

王宗堯得知廣告出街後令銷售產品直線上升,今日話專登掃貨畀媽咪,咁早排俾人影到一齊游水食飯見家長嘅緋聞女友陳詩雅Sarah呢?王宗堯忽然轉口風話有一排冇見,問王宗堯係咪避開對方?佢有言外之音咁話:「唔係,驚佢公司避我啫,唔知呀,佢係Angelababy間公司,可能佢公司主力向內地發展,你知我幾撐本地聲音,可能咁樣有影響內地market啩。」

王宗堯就好肯定表示同Sarah開頭覺得可以試吓相處,之後發現思想唔一樣,無論做嘢同生活都係,o依家唔再諗拍拖住,只諗努力賺錢湊仔(家中貓咪)。不過另一邊廂,女主角Sarah噚晚現身音樂會睇騷時,仲話兩人係認識相處中,到底誰是誰非,真係得佢哋兩個自己先知。