【商台有內賊?】DJ麻利名牌護膚品失竊 最後通牒:我會報警
小偷商台La Mer麻利
商台DJ麻利大前日喺facebook貼文驚爆被偷嘢,一盒價值2千幾蚊嘅超級名牌護膚品La Mer被盜,嬲到震嘅麻利爆seed留言:「其實我已經唔係第一次俾人偷嘢。呢盒嘢,放响我個位,我只係諗住星期日要返工,星期日先搬走,返到去個包裝好似冇打開過,但裏邊最貴嘅一盒La Mer唔見咗。」
原來之前麻利喺商台收到一大盒禮物,裏面有好幾盒護膚品,其中最貴一盒就係La Mer!麻利扯火寫道:「我星期五係見過裡面有乜,我好清楚。個賊偷完盒La Mer綁個蝴蝶就當冇打開過。但你偷盒嘢唔偷埋La Mer張卡片?你當我X嘅唔知裡面有乜?定見到我post咗IG Story就等於你安全?我俾時間你放返低盒cream俾我,如果唔係我報警。」
麻利呢個帖文一出,好多朋友都紛紛留言,連商台同事小儀都驚訝問:「吓?咁crazy???」麻利激氣答:「唔係第一次呀下,仲有另一個苦主呀下,又係La Mer呀下!」小儀:「條友識嘢兼係女呀吓,應該好少仔會識分咩係正㗎吓。」麻利:「總之關心皮膚嘅!」
《蘋果》致電向麻利了解詳情,不過佢卻想低調處理,以短訊回覆:「唔好啦搞到咁大!」記者指如果商台真係有小偷,而且唔係第一次發生,唔應該縱容,麻利就表示:「我明呀,但唔係要搞上報吖嘛!」記者亦兩次聯絡小儀,佢就話又忙工作又忙開會,最後都冇覆;至於商台就回應:「跟麻利溝通了,我們沒有補充。」
記者向森美了解,問佢有冇試過喺商台遇竊?森美接受電話表示:「我試過以為畀人偷咗嘢,後來發現原來擺錯地方,我大懵嘛,梗有啲懵事發生。」對於麻利畀人偷嘢,森美話:「喺公司唔見嘢,呢啲小心啲囉,貴重嘢通常好少擺喺度,不過因為o依家有啲麻煩地方,好多時候啲客戶會送啲嘢過嚟,咁啱客戶啲嘢係貴重嘅,會有啲咁嘅情況出現都唔定,耐唔時都會有嘅,有時原來係擺錯另外同事嗰位嗰種都有囉,但被人偷嘢我未試過。」
麻利於facebook爆seed,斥責有人偷竊,如果不歸還護膚品,會報警處理。(facebook圖片)
麻利又喺留言話,知道受害者唔係得一位。(資料圖片)
麻利話明白唔應該縱容小偷,但唔想搞大件事。(資料圖片)
森美冇試過遇竊,不過就試過大頭蝦,試過有物品擺錯地方以為有人偷咗。(資料圖片)