大台最近深夜重播《刑事偵輯檔案》，除咗查案嘅劇情引人入勝，張大勇(陶大宇飾演)同高婕(郭可盈)、義仔(梁榮忠)同GiGi(蘇玉華飾)嘅感情線，都睇到觀眾咬牙切齒。

噚晚張大勇就奮不顧身咁去救高婕嘅姨甥女棠棠，睇落棠棠係咪好熟口熟面呢，其實佢就係黃美棋喇！今日黃美棋就喺微博度貼咗幾張劇集嘅截圖，佢留言話：「近排重播，很多朋友都截圖給我！昨晚講到....要搵番棠棠呀！壞叔叔....你放開我呀！」

有網民睇到黃美棋嘅截圖，都留言大讚童年嘅美棋BB好可愛，仲有網民慨嘆時間飛逝，亦問美棋BB當時咁細個，到O依家仲有冇當時嘅記憶喎！

美棋BB今日回覆傳媒，佢話：「 係呀，因爲最近重播《刑事》，大家原來都好鍾意睇，嗰陣我大約4歲咁上下，o依家睇番都覺得好好笑，笑自己成舊蕃薯咁。」唔知佢又有冇好回味呢？美棋BB就話：「都幾得意嘅，我都仲記得嗰場俾人綁架嗰陣嘅情況，佢哋叫我係嗰紙箱入邊，扮瞓覺唔好開眼，嗰陣仲好開心，做小朋友(拍戲)有好多福利！」

精選娛聞，喺晒《娛果》
http://fb.com/appledailyent